Ito ang Pinaka...                                                                                                                            

ni: Roselyn Gecale               

                                                                                   

           Silahis ang katulad mong nagsabog ng liwanag… Sa tuwing inaawit ko ang awiting ito’y gumagaan at lumalakas ang aking loob. Nararamdaman ko ang malaking pag-asa ng aking buhay. Nakikita ko ang maganda kong kinabukasan. At buong puso ko itong ikinagagalak dahil sa kabila ng aming kahirapan ay nararamdaman ko pa rin ang pag-asang makatapos sa pag-aaral. Iyon ay dahil sa paaralang MSU-IIT na nasa Iligan City. Binigyan nito ng kulay ang kinagisnan kong mundo. Ay! Muntik ko nang makalimutan, ang paaralang ito nga pala ang may-ari ng awiting napakagandang pakinggan na nabanggit ko sa itaas. Kung iintindihin natin nang maigi  ang bawat salitang nagbubuo sa awiting ito ay talagang nagbibigay buhay sa mga pangarap ng bawat isa. Sa unang  linya pa lang ay mababasa na natin amg salitang “liwanag” na ang ibig sabihin ay siyang ilaw at gabay para maipagpatuloy natin ang bawat laban sa ating buhay.

          Gusto ko lang malaman sa mga bumabasa nito na sa MSU-IIT ako nag-aaral. Kabilang ako sa mga estudyanteng puno ng pag-asa at siguradong may kinabukasan. Ibinabahagi ko lang ito sa inyo dahil sobrang saya ko lang na dito ako nakapag-aral at gusto ko ring magbigay ng inspirasyon sa inyo. Sikat kasi ang paaralang ito, narinig ko pa nga ang sinabi ng may-ari ng inuupahan kong bahay na mayroon daw siyang kaibigang agad-agad natanggap sa trabaho dahil una nitong napasukan ang MSU-IIT kahit hindi siya dito nakapagtapos. Lumipat daw kasi ng paaralan dahil hindi na nakayanan ang mga nakadudugo-ilong na leksyon. Oo, mahirap nga ang leksyon na MSU-IIT pero kung masipag kang mag-aral ay napakadali lang para sa’yo lalo na kung ikaw ay napakatalino. Pero sa nasambit ko na kanina, basta nasa listahan lang ng mga paaralang napasukan mo ang MSU-IIT ay tanggap ka na agad sa inaaplayan mong trabaho. Ang astig! diba? Ganyan kataas ang kalidad nito, talagang pang “world class” na institusyon. Sabi pa nga nila, matatalino daw ang mga estudyante sa paaralang ito. Sa tingin ko naman, tama sila pero ewan ko lang kung kasali ba ako sa sinasabi nila, sila na lamang ang bahalang magdesisyon para sa akin. Ang masisigurado ko lang ay matatalino ang mga guro dito kaya naging matalino din ang mga estudyante. Nabasa ko nga sa “cellphone” ng kaibigan ko na “hindi lang tumatanggap ang MSU-IIT ng mga matatalinong estudyante kundi’y ginagawa din nila.” Kaya nga napakasarap ng pakiramdam kung dito mag-aaral.

            Hindi lang sikat at mataas ang kalidad kundi mura pa at mababa lang ang babayarin. Hindi ka talaga magkapoproblema dahil makakaya lang s’yang bayaran ng mga mahihirap katulad ko. Kung ihahambing natin sa ibang paaralan ay talagang napakalaki ng pagitan. Bakit ‘di mo nalang kaya subukan para masaksihan mo talaga mismo? Laking pasasalamat ko nga talaga sa Poong Maykapal  na naitayo ang paaralang ito dahil alam kong ito ang maging daan o tulay para marating ko ang aking mga pangarap. Siguro ay sinadya  niya ito para naman magkaroon ng pag-asa ang mga mahihirap na mamuhay nang hindi mahihirapan. Ganyan tayo kamahal ng Diyos, talagang gagawin niya ang lahat para sa atin kaya sana naman ay tanggapin natin nang buong puso ang kanyang ipinagkaloob. Huwag natin itong hayaang masasayang nang basta na lang. Gagawin lang din natin ang nararapat para sa ikasasaya niya para hindi siya magsasawang pagkalooban pa tayo ng higit pa.  

             Kung ang lokasyon naman ang ating pag-uusapan ay ayos naman ito at hindi delekado. Alam kong ang iba’y takot sa mga Muslim dahil sa mga narinig nating pang-abuso ng mga MILF noon. Hindi naman siguro lahat sila ay may ganyang kagawian dahil mayroon din akong mga kakilalang Muslim. Sila ay mga mababait at hindi kayang manakit ng kapwa tao dahil pareho lang tayong may mga pusong marunong magmahal at masaktan. Hindi natin hawak ang mundo, tanging ang Diyos lamang ang pwedeng humawak dahil pagmamay-ari Niya ito at nakikihiram langh tayo. Oo, may mga Muslim din dito sa Iligan at sila ‘yong tinutukoy ko na mga mababait. Alam kong hindi lang sila kundi mayroon pa sa ibang lugar. Kaya wala kang dahilan para matakot sa kanila, sa totoo nga lang ay nakapunta na ako sa bahay ng kaklase kong Muslim kasama ang iba ko pang kaklase. Doo’y malugod at buong puso kaming tinanggap ng kanyang ina, inaasikaso niya kami. Ang saya-saya namin doon, nagkaroon kasi kami ng “party” sa kanila. Kita mo na? hindi talaga nakatatakot dito sa MSU-IIT, talagang wala kang makikitang dahilan para matakot. Malawak din naman ang espasyo ng paaralang ito, sa katunayan ay napakalaki na ng populasyon nito ngayon dahil sa katanyagan. Mas lalaki pa sana iyon kung dito ka na rin mag-aaral, diba? Matatatag din ang mga “buildings” at makabago lahat ang mga kagamitan. Basta! ang masasabi ko lang ay napakaganda ng MSU-IIT at wala ka nang hahanapin pa kung dito ka na mag-aaral. Para sa akin, isa itong perpektong paaralan at walang katulad.

             Dito ay mayroon ding sariling mga aklat na binubuo ng mga guro para mas maging epektebo ang pagiging matalino ng mga estudyante. Ang bawat leksyon na laman ng aklat ay talagang nabibilang sa pang “world class”. Nilikom ito ng mga guro mula sa iba’t ibang tanyag                               at makabuluhang mga aklat. Iniipon-ipon nila ang mga leksyong karapat-dapat para sa kanilang mga estudyante. Sinisigurado din nilang tama ang mga impormasyong nakuha nila para tama rin ang kanilang maibigay sa mga estudyante. Ganyan sila kagaling magmahal ng mga estudyante at gumawa ng paraan para maging mainam ang pagtuturo sa mga estudyante. Hindi nila pinabayaan ang mga kinabukasan sa mga  ito, talagang bukas sa kanilang loob ang tumulong. Hindi sila makasarili, talagang makikita at mababasa natin sa kanilang puso ang napakaganda at kahanga-hangang ugali. Ang mga mahuhusay na mga gurong ito ay talagang maipagmamalaki sa kahit saang lugar at kahit kaninong tao. Hindi natin iyon maipagkaila sa lahat.

           Sa bahaging ito ay taos-puso akong mag-iimbita sa bumabasa nito na kung hindi ka pa parte ng paaralang MSU-IIT  ay halika na! Ano pa ba ang hinihintay mo? Bubuhayin dito ang iyong mga pangarap at hindi ka talaga mawawalan ng pag-asa. Nandito na lahat, diba sabi ko kanina ay wala ka nang hahanapin pa dito.  Sa sinasabi ko na, dito ay sigurado ang kinabukasan mo at iyon ay walang duda dahil dito ay nagtutulungan ang bawat isa. Hindi nangyayari dito ang pang-aapi sa kapwa. Ano pa ba ang silbi ng mga pangarap kung hindi mo ito susubukang tuparin? Alam naman nating mahalaga sa atin ang ating mga pangarap, diba? Basta maging masipag ka lang ay hindi ka talaga mabibigong maabot ang iyong mga pangarap lalo na kung dito sa MSU-IIT mo iyon sisimulang tuparin. Totoo lahat ng sinabi ko, hindi ako nagbibiro at lalung-lalong hindi ako nagsisinungaling. Hindi ko kaya ugali ‘yong magsinungaling! Mabait ako no? kaya huwag ka nang magdadalawang-isip na maniwala sa akin. Kahit may mga isinulat ako sa ilang bahagi sa itaas na medyo nakatatawa ay nagsasabi talaga ako ng totoo. Sinulat ko lang iyon para hindi kayo aantukin at matatapos n’yo talagang basahin itong sulat ko. Iyon lang kasi ang naisip kong paraan para magkainteresado naman kayong basahin ito. Para rin kaya ito sa inyo, sa ating lahat. Pinapangako ko, totoo ang lahat na sinusulat ko. Iyon ang nakita at nasaksihan ng dalawa kong mata simula nang maging estudyante ako dito sa MSU-IIT. Ang huling masasabi ko lang ay “ito ang pinaka…” kayo na ang bahalang magpatuloy sa salitang pinaka… dahil alam kong alam n’yo kung ano ang maaaring idagdag sa salitang yan. Ayos ba? Tayo na’t sabay-sabay nating isigaw ang “MSU-IIT!” Ay! Bago ko nga pala makalimutan, ito ang kahulugan ng MSU-IIT (Mindanao State University – Iligan Institute of Technology).